有朋自遠方來，一位美國顧問透過中介人安排，趁在香港探訪之便，搵左丁山吃午飯，傾吓香港及中國問題。互相介紹之下，先知道呢位美國Ｄ先生來自波士頓，二十五年前曾在香港教英文及在美資銀行工作一年。佢到沙田一行，發覺與佢在此地教英文之時有驚天動地之變化。佢問：「香港變動得太大、太快，現在究竟對英語有冇以前咁重視呢？」你話點答？當然重視啦，但重視之餘，好多學生啲英文好似冇以前啲學生咁醒噃。
Ｄ先生又問：「香港最叻啲學生鍾意主修乜嘢科目？」答案好易，左丁山立即講：「醫學、法律、會計，因為容易搵工。」Ｄ先生搖搖頭：「醫生、律師、會計師都係為他人服務嘅，本身唔會create創造財富，創造GDP！」
香港好少有人咁講嘅噃，未諗過㖭，值得深思。於是問佢自己讀邊科呀？Ｄ先生答：「在耶魯主修非洲研究！」唉吔，冷門到極，Ｄ先生講出嚟，自己都笑。不過佢立即補充：「廿五年前離開香港之後，到哈佛讀MBA、FletcherSchoolofDiplomacy讀國際關係，讀完之後，到麥肯錫做顧問，之後輾轉做過科技公司，管理過Lotus嘅亞洲業務，現在做緊科技顧問。」Lotus1-2-3係微軟嘅Excel出現之前，最流行嘅spreadsheetprogram，八十年代中生意好到極，後來就俾Excel打扁咗咯。Ｄ先生冇讀過科技，竟然成為吃得開之科技顧問，真係服咗佢，於是對佢講：「你勝在讀親都係名校，招牌夠照。」Ｄ先生微笑不語，將話題轉到中海油收購優尼科、海爾收購Maytag……
真正名校畢業之人，去到邊都有人聘請，恨死隔籬，好彩創造GDP之人，唔係名校畢業生嘅專利啫。多年前《壹週刊》寫過一個專題，就係：「渣校名人」，曾引起好多人討論，寫名校名人，新聞性就冇咁強咯。