自從沒了金獅、百視達，又有BT瘋狂下載，以為租碟舖無利可圖，但原來街坊式經營的租碟舖日漸強大！現時全港逾200間，兼且愈開愈多，不過為保持競爭力，個個奇招百出。冧價搶客不再新鮮，24小時營業、還碟箱、分店還碟等服務承諾亦是回應租碟者的訴求。最新鮮概念是先買後回收，差價當租金，愈來愈多賣碟舖頂唔順加入租碟陣營！你話無肉食就係假，唔係電影公司點會眼紅租碟舖建議修例趕絕！
記者：邵超
攝影：楊錦文
因為平企得住
租碟者的心態大概可以「不在乎天長地久，只在乎曾經擁有」來形容，平要緊，但$10一隻VCD也嫌阻碇唔想買，更何況入場睇戲？網上某留言最傳神：「有些影片，消費者覺得花數元租碟看已經足夠，不值得花$40、$50購一張戲票，就算當局趕絕了租碟店，這些影片都難以吸引消費者走入戲院。」吸引消費者入場睇戲難，租碟店要留住消費者亦唔係易事，要符合平、新、正、唔煩四大條件才可以生存，很多租碟舖都要諗盡方法去𠱁消費者買套票。
招一：先付全數 倘回收當租碟
先買後回收的概念，兩年前已在租碟舖局部出現，近一年因租金上揚導致更多賣碟舖轉型出此招。店內部份影碟註明只賣不租，但承諾客人在限期內歸還，即可以二手價回收，變相買賣差價就當成租碟價。
灣仔328商場某賣碟舖就是一個例子，ModelGerman花$19買了一隻周星馳《大內密探零零發》VCD，碟上註明七天內以半價$9.5回收，扣除回收價即租碟價為$9.5/７日；另一齣新片《三岔口》VCD售$39，三日兩夜回收價$32，即租碟價$7。海鮮價視乎該齣片的市場價值，事實上很多失魂魚忘記或遲還碟被罰款，真係當買咗好過！
招二：24小時還碟計少一日
現時租碟價一般是每日VCD$3-$10、DVD$10-$20、劇集$30-$50，租碟者最常發生的事，就是忘記還碟，或者突然有事來不及睇碟導致遲還碟，分分鐘$5變$10。深水埗碟皇之皇就提供24小時還碟服務，於每天營業時間過後，拉上閘門就會出現一個還碟箱，只要在還碟日當晚投入箱內，就不作逾期還碟論，方便失魂魚。
招三：不設套票分店還碟
有5年歷史、7間分店的視超戶經理戴先生表示，公司設有分店還碟服務，其實是由會員提出。「公司實行會員制，只做散租不做套票，唔使畀按金。租碟的人多數在屋企附近租碟，唔會因為我哋有七間分店而特別跑過來租。相反做埋分店還碟，就係因為有好多客人唔記得還碟，或者貪方便要求我哋咁做！」
租碟文化：VCD搶手過DVD
其實租同買都一樣咁渴市，始終睇戲是香港人最重要的娛樂之一，貪平和方便就最緊要，唔係BT都唔會咁猖獗！近期最受租碟者歡迎之一的《擊情》，香港一手碟約售$130，二手碟$60-$70，租價是$10-$15，視乎你想永久抑或短暫擁有。視超戶主管張小姐說：「𠵱家啲人鍾意租多過買，凡有新碟一定搶手；或者有續集推出，之前的戲都會多人想租，估計受歡迎的會準備超過20隻畀會員租。𠵱家租VCD的人一定多過DVD，佢哋旨在睇吓。租電視劇的人就特別死心眼，追日劇唔會睇韓劇，睇韓劇就唔會睇日劇，鍾意港劇就日、韓劇都無興趣租，分得好清楚。」
今期最受歡迎租碟榜（排名不分先後）
你鍾意租定買？
租碟派
買碟黨
二手店：歐版價錢最硬淨！
現時港產片質素低落，連荷李活片都一味賣明星和特技，無劇情可言，消費者當然唔想劣片擺在屋企睇到眼火爆！所以二手碟和租碟一樣有市場，兩者殊途同歸。
旺角信和二手店CD“經濟”特區店員Jonathan表示：部份買碟的人，最喜歡買完翌日即轉售二手店再買新碟，燒碟話咁快。「買二手碟的人對影碟質素好有要求，唔似租碟班人貪平唔鍾意DVD。𠵱家最好價錢順序係歐洲版、美國版、日本版和香港版，而新戲或者有續集上的舊片就快收快賣。」
