溫碧霞的好友齊芷瑤在上海開水療會所，除邀她做開幕嘉賓，還請她入股，但溫碧霞自知不擅理財，故放棄合股，有時間亦寧願拍劇及關心老人家。
溫碧霞（Irene）早前赴上海為齊芷瑤開設的水療會所擔任剪綵嘉賓，並順道參觀該會所，原來齊芷瑤曾經游說Irene合作投資，但最終她沒有答應，因為她自知不擅理財，不適合做生意。
唔拍劇休息一年
雖然Irene沒有投資，但她大讚齊芷瑤有眼光，因為該間水療會所辦得很好，Irene說：「我都好鍾意做spa，同齊芷瑤又係好朋友，所以佢咪想搵埋我一齊投資，但我都冇時間打理，如果淨係攞筆錢出嚟畀人搞，自己完全唔理，咁就冇意思啦！加上我又唔識理財，做生意咪蝕本收場？所以都係唔好累人啦！」
溫碧霞有一位理財很精明的丈夫，她會將部份收入交由丈夫投資，所以她不必費神，Irene表示：「早排有朋友搵我合作搞時裝生意，我都有興趣，但嗰陣我拍緊劇好忙，邊度有精神諗呢啲嘢？講真我最鍾意都係演戲，所以做生意唔會係我第一選擇，不過早排拍得劇太多，真係覺得好辛苦，完全冇時間享受人生，所以我決定今年內都唔會再接拍劇集。」
與寂寞老人聊天
此外，溫碧霞周日抽空去了澳門探訪老人院，與公公婆婆聊天，又派禮物給他們，她表示：「之前我已經做過兩次呢類嘅老人院探訪，我覺得佢哋幾寂寞，有啲老人家冇兒冇女，又或者親人唔理佢哋，真係好可憐。」
