網球發燒友鄭嘉穎日前與fans聚會，更充當教練教授兩位女fans打網球，十七歲fans晴晴即場要求擁抱偶像，一圓其索偶像男人味的夢想，結果被對方熱情擁抱兼獻吻的鄭嘉穎即時變身怕醜仔。
鄭嘉穎日前與兩位女fans晴晴和Kathy相約在將軍澳打網球，並由鄭嘉穎充任教練，教授二人正確的握球拍、發球及揮球拍等動作。問到兩位fans為何鍾情鄭嘉穎時，Kathy說：「佢好人囉，唱歌又好聽，佢做咗好多慈善嘢㗎。」
而晴晴則直接地說：「我好想大力抱吓佢，fantastic，想知抱佢係乜嘢感覺。」鄭嘉穎聞言即大笑起來，但亦樂意為對方一圓夢想。
鬍鬚拮面
沒料到晴晴擁抱鄭嘉穎時，竟一頭埋進他的胸膛，閉上眼睛錫向其胸膛後，再徇眾要求親吻鄭嘉穎的臉頰，頓時令入行十二年的鄭嘉穎變成怕醜仔，場面搞笑。
其後問晴晴的「攬後感」時，她一邊回味一邊笑說：「好有滿足感，好開心，好好攬，但佢攬得好唔夠實。唔知佢係咪打完波之後換咗衫，聞唔到佢陣味，我好想認清佢陣味㗎！佢塊面有啲鬍鬚，拮拮哋。」而鄭嘉穎提到fans突然獻吻一事時，則面紅紅地說：「估唔到呀，呢下有啲突然。」
重出樂壇
此外，無綫近日安排唱家班出身的鄭嘉穎重出樂壇，他主唱的劇集《YummyYummy》主題曲《三角兩面》，已收錄在《男人魅》大碟內，該劇下月便會推出。有傳無綫高層樂易玲對鄭嘉穎和吳卓羲特別寵愛，對此鄭嘉穎只說：「無可否認呢兩年我嘅機會多好多，好多謝公司畀機會，但我都喺呢行十二年，返TVB都五年，公司係覺得適合至畀你做，唔係夾硬嚟就得，問心無愧就得。」
採訪：朱倬誼
攝影：陳偉權、仇志中
