由《絕世天劫》導演米高比爾（MichaelBay）執導、型男伊雲麥葵格同靚女施嘉莉祖安遜（ScarlettJohansson）主演嘅科幻動作巨製《謊島叛變》，下星期四就會喺本地上映，女主角施嘉莉日前喺紐約接受本報訪問，自爆首次拍呢類動作大片，吃咗唔少苦頭。
「捉到我隻手就斷」
《謊島叛變》係講述兩位複製人逃離地下世界、找尋複製人被殺真相嘅故事，片中有唔少米高比爾式玩命動作場面，施嘉莉話：「有幾次真係拍得好辛苦，但因為有成幾百個臨記一齊演出，我唔可以拖累其他人，所以只好忍住痛頂硬上。而且我同伊雲一日跑成十四個鐘，全身都係瘀傷，自己個膝頭又紅又腫，又撞傷咗個頭，痛得好厲害。但係對咁大製作嘅電影嚟講，時間就係金錢，所以受傷都係在所難免！」
施嘉莉重自爆有幕吊喺三層樓半空中嘅戲，嚇到佢同伊雲腳都軟，佢話：「拍攝嗰陣雖然做足安全措施，但伊雲捉到我隻手都就快斷，就算我大聲叫痛，佢仍然擔心一放手，我就會跌落去。」
「從未見過佢瞓覺」
施嘉莉雖然捱到周身傷，但仍不忘大讚伊雲同導演，佢話：「你同伊雲合作，永遠唔知下一步係點，總會有驚喜，係考自己反應嘅機會。同導演米高合作都係非常寶貴嘅經驗，佢令我覺得演戲係生物嘅本能，米高一埋位就開始拍，一直拍到離開為止，無時無刻都係咁拍，我真係從來未見過佢食飯或瞓覺！」
特約記者JoleighLo紐約直擊