滙標獨立調查三人小組嘅報告好大殺傷力，民主黨呢鋪真係賠了夫人，使咁多錢去調查，但就搞到自己同涂謹申水洗都唔清。𠵱家啲左派同左報，個個就攞住份報告逐隻字刨，睇吓重有冇黑材料砌民主黨同阿涂，呢鋪真係大鑊。
既然滙標報告咁多讀者，𠵱家咁啱有書展，有人同八方建議，不如叫民主黨嗱嗱臨將本報告出書賣錢，唔好再俾人免費download，焗住啲左派、中聯辦、港澳辦同國安要一齊買書，話唔定一個中聯辦都可以買幾千本，咁至少民主黨都可以賺番啲版稅，可能重可以賺番賠償畀立法會嗰十三萬蚊。
講開書展，次文化堂彭志銘噚日同八方講，已經斷印、得番幾百本貨尾嘅舊書《老懵董》今年竟然好好賣，表現僅次於新書《煲呔曾》，其他舊書好似《掃把頭》都唔得啦，唔知係咪啲市民開始懷念老董？
爆料熱線：29290000、27860099
報料傳真：26239278
報料電郵：[email protected]