沈殿霞昨日出席兒歌金曲頒獎禮記者會，稍後其愛女欣宜會為該頒獎禮任表演嘉賓，肥姐表示欣宜回港工作喊辛苦，她告誡愛女日後入行會更辛苦，至於欣宜日前與關智斌拍MV，肥姐謂只准攬不准錫。
肥姐沈殿霞、容祖兒、黃宗澤、鄭融及梁靖琪等昨日在尖沙嘴出席無綫《兒歌金曲頒獎典禮2005》記者會，肥姐在頒獎禮當日會擔任司儀，其他歌手都有歌候選。
戥女兒心痛
肥姐表示愛女欣宜屆時也會做特別嘉賓，並會有特別表演，欣宜上一次出席兒歌頒獎禮只有八、九歲，現在她已是長得亭亭玉立的少女，提到欣宜前日與關智斌拍MV時被攬，肥姐說：「攬下都OK，唔准kiss囉，冇必要。個女返嚟都戥佢慘，本來佢升大學前嘅暑假可以好輕鬆，𠵱家成日俾狗仔隊跟。」談到狄波拉日前表示欣宜回港後，狗仔隊就轉移目標，不會再跟蹤謝婷婷，肥姐謂：「我同拉姑好死黨，啲狗仔隊無孔不入㗎。」肥姐又謂欣宜回港工作辛苦之極，她說：「佢前一晚四點幾瞓，第二朝七點幾起身，第時入行呀，幾個鐘都冇得瞓呀，𠵱家咪舒服囉。」
處女作入圍
此外，祖兒表示她第一首兒歌便能入選，相當高興，問她是否想雄霸兒歌市場，祖兒說：「我識唱歌冧人瞓，之前髮型師帶個兩歲囡囡出嚟，個個唱歌都冇用，我一唱佢就瞓，我都希望喺兒歌市場有意想不到嘅收穫。」至於梁靖琪有首新歌《小姐先生請戒煙》，她表示曾叫父親梁家樹戒煙，但不成功，她說：「佢年紀大，叫佢唔好食咁多煙，我以前讀書貪型食過，但冇上癮。」
採訪：卓美娟 攝影：葉君海
