大市連升7日，恒指收14620，再升17點，成交仍活躍，有232億元。基本上，恒指在升上14600水平後，已整固了3日，只係恒指每日有些微進帳，由於短期升幅已大，若未來兩三日，大市略作調整，回落一、二百點，則後市發展會更為健康。
國指升勢一發難收，大升108點，成功衝破5000點大關，高收5090，中石油（857）急升帶動，居功至偉。油價呢輪由高位回落，但中石油可以大升0.40元，高收6.50元，成交大增到2.8億股，總值17.7億元，大家可以睇到大戶嘅威力。傍晚時聽到人民幣突然升值，更令人佩服大戶嘅先知先覺。
金屬股繼續耀武揚威，最勁兩隻仍然係中鋁（2600）同江銅（358），前者收4.80元，升5.5%；後者收4.075元，升5.8%。鋼鐵股以重鋼（1053）升得較急，收2.75元，升4.7%。噚日推介的慶鈴（1122）收1.43元，升2仙，暫時仍受制1.44元的下降楔形阻力，但一衝破時，便要追進。市場有消息話，慶鈴好快會有大動作，一兩月內就會見功。
大股東或有後着
呢個大升浪，藍籌先發力，之後輪到國企，到呢兩大類要唞氣之時，二三線股就會接力而上，個別大落後，有實力的，更可以優先選取。
滙漢控股（214）派成績表，蝕完再蝕，表面上好令人失望，但實際上，盤數唔係咁差。滙漢大股東處心積慮，刻意「製造」一盤「蝕本」帳，也因為如此，滙漢股價才會長期低沉，大股東究竟有何部署，只有讓時間告訴我們。
睇番盤數，由於減持泛海國際（129）（持股量由52.8%降至40.5%），05年度（3月結算），營業額5.53億元，減28%；毛利1.7億元，減7.6%；但股東應佔虧損1.6億元，而04年度虧損係2.28億元。要蝕本，主要係兩條數，一係泛海由附屬轉為聯營，出現1.5億元的會計損失；二係非核心投資的資訊科技、節能儀器同醫療保健等業務，表現未如理想，一次過作出8700萬元的減值準備。一次過撇晒，滙漢翻生可期。
滙漢大股東做咁多嘢，令每股資產值由12.5元降至8.54元，現價仍大幅折讓72%。投機持有，博大股東有動作，股價即使翻一番，仍折讓44%！
郭兆誠