唐唐噚日下晝開始放假，真係放得合時，因為北京噚晚七點出其不意，宣布人民幣升值，搞到任志剛要漏夜返去國金總部開會見記者，而署理財司葉澍堃更加要出稿，穩定大家嘅信心。咁政府公告亦好奇怪，竟然只出唐唐開始放假嘅日子，放到幾時就欠奉，唔知係咪隨時會返港，不過，據靈通消息，佢八月初先返工。
唐唐放假，兼任嘅唔係財經事務局局長馬時亨，而係經濟發展及勞工局局長葉澍堃，好似唔係幾啱路數。知情者話，原來喺老董時期，已經按司局長嘅份量同資歷排咗一條隊，睇吓行會排位就知。八方且將次序列出，睇吓大家估得啱唔啱，三司唔使排，《基本法》規定晒，即係肥許、唐唐同詩姐，跟住係孫公、阿瑟王、平哥、肥平，然後先到葉澍堃、冬冬、馬仔、林D9、李少光、鬍鬚曾以及最後加盟嘅周一嶽。你問阿瑟王同肥平點解排得高過大隻葉？八方都唔識答。
爆料熱線：29290000、27860099
報料傳真：26239278
報料電郵：[email protected]