阿爺失驚無神就將人民幣升值2.1%，跟手重搞埋滙率參考一籃子貨幣，對於只識炒股，唔多識睇宏觀經濟的小初嚟講，當堂企咗響度，唔識有反應，但經紀黃就話，唔使審今日個市實會大幅波動，早排湧入炒人民幣升值嘅熱錢可能會撤走，唔排除大市或者會跌。
人民幣升值有咩好諗？經紀黃就話，積弱已久的航空股或有轉機，但佢就覺得中國國航（753）有得諗。
佢話，由於油價勁升，國航上市大半年以來一直都無咩運行，但作為航空股，購買飛機等資本開支以外幣為主，債務同樣以外債為主，所以人民幣升值，有咩理由唔會受惠？重有，唔好忘記咁耐以來，國航與國泰（293）之間的合作，甚至重組傳聞揮之不去，家陣股價又在低位徘徊咁耐，突然間有消息彈出，真係唔敢講話無得炒喎。
國航上市以來，最高3.25元，最低2.425元，昨微升1.96%，收2.60元。
慕容小初