港股噚日早段在中海油（883）急升的支持下抽上14673，升106點，其後中海油雖回軟，但有長實（001）再度接力，結果大市升幅收窄至34點，收報14602，成交近240億元。大戶繼續玩輪流炒，但炒極都未輪到滙控（005），後市都幾難有突破。滙控8月1日就會公布中期業績，黑客相信就快輪到滙控炒上。
中海油爭奪優尼科，對手雪佛龍加價至171億美元，但仍低過中海油的185億美元，不過就獲得優尼科董事會支持，而中海油仍企硬維持185億美元收購價，呢個價屬全現金，當然比雪佛龍的股份加現金價吸引得多，其實反正股東都唔太喜歡中海油收購優尼科，又何必再調高收購價呢，就算收購失敗都無所謂。
噚日中資股好消息滿天飛，除了炒人民幣升值外，亦傳人行唔傾向加息，只會繼續壓抑過熱的行業的信貸，同時中國公布上半年經濟增長9.5%，高於市場預測，加埋有標普調高中國主權評級，跟住更傳出中國鋼鐵業會進行重組合併，市場都未及消化上述眾多利好消息，H股已率先炒上，國企指數曾突破5000升至5040，最後收報4982，升90點或1.8%，升幅遠超大市。
中資股好消息滿天飛
不過最近由於油價上升，令不少國企股紛紛發出盈利預警，換言之，除咗石油股之外，相信好多國企的中期業績都可能受到能源及原材料漲價所拖累，換言之，國企的中期成績表肯定唔慌好，國企股升勢能否持續實在難講。
中銀香港（2388）突然調高最優惠利率0.25厘至6.5厘，與其他銀行看齊，其後恒生（011）亦宣布跟隨，反映中銀呢類有一定存款基楚的銀行亦在資金成本方面受壓，隨着資金轉向高息存款，相信滙豐追加只是遲早的事。
阿虎