英國巨胸名模佐敦（Jordan）早前同歌手男友PeterAndre生咗個仔，經過一輪火速收身後，佐敦已決定同Peter喺九月結婚。而最鍾意出風頭嘅佐敦，諗住喺婚禮上面搞吓噱頭，要着件全世界最長嘅婚紗出嫁，因為佢希望喺自己嘅大日子度打破世界紀錄，攞番個彩喎！
據英國《太陽報》報道，佐敦希望喺九月出嫁嗰日着一條接近九百米長嘅婚紗行禮。根據資料顯示，𠵱家全世界最長婚紗嘅紀錄，係由一個荷蘭新娘喺○二年創下，當時佢着住條長達二千五百四十五呎、即係七百七十六米長嘅婚紗出嫁，不過如無意外嘅話，呢個紀錄好快將會被佐敦打破。
破紀錄貪過癮
雖然佐敦唔肯講佢會着邊個設計師嘅婚紗，不過睇過佐敦件婚紗嘅人爆料話：「佐敦着咗條裙真係幾靚，其他人未見過一定唔信條裙會咁長。其實佢想喺出嫁嗰日着得特別啲，等人人記得。佐敦咁做唔係話要出位，而係想做啲特別嘅嘢啫。」