打正旗號以真正Twins身份出現，有型又靚仔，風靡一眾女生之餘就連𡃁仔都冧的SOLER，出道短短幾個月已經人氣爆燈！首批新碟5,000隻一星期斷貨，加印都加唔切！佢哋更加放下身段，落大專中學、落尖銅旺行人區街頭賣唱，乜都唔使錢，Fan屎感動到喊！
記者：黃藹瑩
攝影：陳陶鈞
街頭巡迴演
7月19日7:00pm 尖沙嘴清真寺對出
7月20日7:00pm 銅鑼灣駱克道SOGO後街
7月22日8:00pm 壓軸旺角老地戲院對出行人區
查詢：www.solermusic.com/
直擊！尖沙嘴街頭Live
SOLER可謂非一般新人王，連搞Show都特別過人，重喺正尖沙嘴地鐵站出口旁邊開Live！從來都冇歌手咁做過之餘，佢哋唔介意天氣極熱、唔介意冇錢收，總之務求更多人可以聽到佢哋的音樂！雖然個Show只係維持咗半個鐘頭多啲，但SOLER絕對交足功課，冇走音、冇甩嘴，總之擺明態度佢哋唱Live都極得，點止Sell樣咁簡單！
當日的氣溫有成34度，熱到成身汗，小記就連行多步都唔想，但SOLER的Fan屎實在絕不簡單，由下晝3點等到夜晚8點，一聲怨言都冇！LiveShow一開始立即全情投入，全程維持興奮狀態。尖叫、狂呼、影相、跟住唱就係指定動作，一致到極，實在要寫個「服」字。
Fans義務派傳單
偶像有幾掂，睇吓佢有幾多Fan屎就知；相反，Fan屎有幾冧偶像就要睇佢哋肯為佢做幾多嘢喇！好似SOLER咁，現場HardcoreFan屎都有十幾廿個，而且個個都肯為咗佢哋8點個LiveShow，下晝3點去到尖沙嘴，大熱天時向途人派宣傳單造勢，認真佩服！呢啲Fan屎你話係畀錢買返嚟的職業Fan屎都冇人信！
SOLER：我哋好興奮！
SOLER新碟《雙聲道》首批出碟5,000張，唔夠一個禮拜已經斷貨加印，咁賣得連SOLER自己都估唔到。佢哋話本來對自己的首張CD都冇咁大信心，諗住CD就好似一張BusinessCard，只係話畀人知有呢隊Band嘅存在。頻頻出校園Show同街Show都係希望可以用歌表達自己對事同情的睇法，感染多啲人。「街Show全屬公司安排，我哋覺得可以同歌迷親近啲！多人識咗，亦多個表演機會。新碟有咁嘅成績，真係好興奮！」
一周銷量嚇親人
新人：SOLER《雙聲道》5,000張
衞蘭《Day&Night》10,000張
王菀之《Ivana》15,000張
一線：陳奕迅《夕陽無限好》25,000張
HMV：首周排第二！
HMV唔方便透露售賣數字，但截至星期二為止，SOLER《雙星道》佔本地銷售榜No.2！
信和唱片店：要再返貨！
信和ECHO唱片店員胡生：「佢哋好似好低調，所以當初只係攞咗60幾隻，點知星期六（出碟後2日）已經賣得七七八八。」
新鮮Live王：呢個係市場策略！
SOLER出道到𠵱家做得最多一定係校園Show，單單喺7月頭往各大專院校同中學的LiveShow已經做足5場，重未計BarShow同街頭Show，幾乎日日都有得做。負責SOLER市場策劃的斯思話，呢個係公司的特別安排：「我哋一個半月前諗到呢條橋，覺得SOLER個樣掂，做校園Show、街Show同商埸Show可以增加佢哋嘅音樂Exposure，等多啲唔同層面、唔同年紀的人聽到佢哋嘅音樂，而且以佢哋鬼鬼哋的外形，絕對可以打入年輕人市場！呢啲街Show我哋響42日前已經同食環署申請咗，攞正牌㗎！」
SOLER我哋支持你！
Jessica：好感動！
Jessica在01年已經整咗個SOLER網頁：「我4年前聽到佢哋唱live之後，好感動！」
Emily：好震撼！
「佢哋唱Live好震撼！咁近距離睇佢哋好Close，佢哋對Fan屎好好！」
YoYo：好大方！
「SOLER唔使錢做Live好大方！佢同其他Artist唔一樣，其他人要畀錢先睇到。」
後記：小記第一次聽SOLER唱Live只有一種感覺，就係：「好得！」難怪出道咁短時間就有咁多Fan屎，睇嚟𠵱家淨做偶像派係唔夠嘅，實力先至真正冧到Fan屎！SOLER話佢哋喺未來幾個月會搞個演唱會，到時一定會捧場！