公司駐京代表Ｖ回港述職，趁機會搵左丁山飲茶，問吓香港政治經濟情況，左丁山就聽佢講京華故事。駐京Ｖ只得三十零歲，對中國近代史唔係好熟，聽落佢重係好鬼美國式，擺不脫美國西部風格，即係唔慣打官腔、擺款，說話直接。左丁山笑佢：「北京不是矽谷，你要逢人只說七分話，未摸清楚對方背景之前，唔好係咁噏。」駐京Ｖ話：「都係嘅，最近一個與我聯絡開嘅國企單位嘅小張，碰到我就呻，話想去英國探女朋友都唔得。我以為佢職位甚低，一個月薪水唔夠買一張機票，於是自告奮勇，話同佢上網搵平價機票。點知小張冷笑一聲話『錢不是問題，假期才是問題。』問真啲，小張父親乃係乜乜國企單位高幹。我周圍都係呢類人，都唔知有冇無意中得罪晒。」
講講吓，駐京Ｖ嘅京華故事只係新瓶舊酒，古已有之，於是教佢：「嗱，晚晚放工之後，唔好去蒲吧或卡拉ＯＫ，用十晚八晚睇完套高陽三本小說《胡雪巖》、《紅頂商人》、《燈火樓台》，從胡雪巖發迹睇到佢家錢莊俾人擠提、破產，你就知道喺北京，今之視昔，有如昔之視今，走門路、送土儀、上下疏通、憑藉高官上位等等方法，全都有齊。
駐京Ｖ有啲委屈咁講：「我喺香港讀完中學先至去美國，點都知道『香港好在有ICAC』係乜嘢一回事。聽你咁講，我要體會胡雪巖嗰套，直情係觀念大倒退，點可以接受呀。」香港真係勝在有ICAC（只要佢唔違反人權）。
廉署成立三十餘年，對四十五歲或以下嘅行政人員甚有影響。可惜呢，咁多人北上做工，好多時都會被迫或因耳濡目染，接受咗上面嘅行事方法，香港七百萬人點樣抗拒十三億人嘅習慣呀？駐京Ｖ駐京兩年，至今未懂國情，仍有赤子之心，只怕久無建樹，會俾公司炒魷啫。