林志玲最近病情反反覆覆，日前有報道話佢曾經使用Durogesic止痛貼，𠵱家美國食物及藥物管理局調查緊，懷疑呢隻止痛貼同一百二十個病人嘅死亡事件有關，本來志玲個主診醫生朱允濤就話志玲冇用過，不過志玲嘅哥哥林志鴻就話志玲用過一次，佢日前話：「止痛貼只用過一次，我問過其他醫生，沒有常使用，應沒有問題。」
志玲媽媽吳慈美就話：「我不知道，就算有貼，一兩次應該也沒有關係。」
睇《靚太》解悶
志玲媽媽噚日買咗件好似孕婦裝嘅睡衣畀志玲着，呢幾日志玲三餐都係食粥，以蛋、肉同青菜做餸，重好鍾意食水蜜桃㖭。而志玲噚日就睇美國劇《靚太唔易做》嚟解悶，睇佢嘅精神唔錯，本來助手想叫佢寫封信多謝各界關心，點知志玲又好似開始唔多舒服，之後就瞓覺休息。
志玲後日會由家人陪同下乘坐國際SOS嘅醫療專機返台灣，不過事前要做檢查，冇問題先可以上機，點知朱允濤醫生竟然話：「甚麼時候要做檢查我都不確定，你們怎麼知道？還有周六出院我怎麼也不知道？」似乎志玲家人同醫院溝通上出咗問題喎。