大市繼續在高位整固，國企就大轉勢，國指一度上升近150點，收市4982，仍大升90點，金屬股果然發力，中鋁（2600）高收4.55元，升5.2%；江銅（358）收3.85元，升4%；鞍鋼（347）亦見賓虛場面，最高掃到上3.925元，收3.875元，大升5.4%，成交金額2.36億元。
大行對內地汽車業前景看法雖有分歧，但慶鈴汽車（1122）就連升兩日，由低位1.28元升上1.41元。第2大股東五十鈴在5月提出1.92元局部公開收購後，慶鈴股價已整固兩個多月，近兩日由低位回升，好大機會係整固已完成，下一個升浪，同今年上半年的相比，會升得更急，升幅會更大。
看好慶鈴，有好多理由。1五十鈴以高溢價，斥資6億多元，增持慶鈴至20%（總發行股數計），如冇後着，冇人會信。五十鈴同慶鈴已傾緊設立發動機公司同銷售公司，日後唔排除會有更大的注資行動。
日後獲注資機會大
2五十鈴的收購已完成，但有一點少有人留意，就係並非所有合資格的股東都接納收購。五十鈴原本要收購3.25億股，但照接納收購之數，就只有8.2億股，相當於H股股數約66.21%。五十鈴原本持有13.85%，亦即有約20%、股數約2.5億股的H股並冇接納收購，呢班股東係乜嘢人，點解有「着數」唔要，耐人尋味！
3慶鈴重組同擴業後（相信好快會有動作），接單同競爭能力將會大為增強，盈利會以倍計上升，股價亦會同步。
4近兩個多月，慶鈴股價由1.95元回落到1.25元，形成大型下降楔形，若升穿下降軌1.44元阻力，而又有大成交配合，新升浪便可確認，量度上升目標係2.35元。
5睇遠啲，由03年底開始，慶鈴走勢成個大圓底，升破頸線後出現的大型整固，可視為後抽，若再破位而上，以大圓底的量度升幅計，目標係2.50元。
慶鈴升上2.50元（預期升幅有77%），唔好話冇可能。大家諗吓，慶鈴日後會有好大發展同注資，發行新股機會高於一切，現時每股資產淨值2.57港元，新股作價肯定唔可以「低水」。到時候，股價會否急升？
郭兆誠