恒指高低波幅107點，最多升過107點，最差打和，埋單升34點。大市喺新高水平，難免反覆。炒家比較喜歡炒C輪，𠵱家入市買C輪，最好將注碼收細。穩陣做法，則唔平唔買。講到造淡嗰便，想買P輪，則提防挾倉。
恒指C輪4723：恒指C輪4723熱到出煙，有12億份轉手，金額2.6億元。隻輪對沖值66%，條數咁計，恒指每變動100點，變幅0.7%，隻輪就變化12%。𠵱家恒指每日波幅，講親100點甚至以上，所以隻輪較易變化12%或以上。隻輪個個位都有成交，短炒啱晒，當然最好係喺低位先至上車，高位追落去，驚住冇水位，亦可能輸錢。昨日早段最高價撲落去，到收市埋單已經輸咗9%，而隔晚揸貨者，則仍有帳面利潤4%。
4723喺9月尾夠鐘，輪價21.1仙，溢價1.4%，槓桿率24.3倍（有效16.3倍），引伸波幅14.9%。
中海油C輪3864：中海油C輪3864升1.5仙，收37仙，短炒吼住先，10月初夠鐘，溢價3.7%，槓桿率12.6倍（有效8.1倍），引伸波幅31.8%。中海油（883）消息五時花六時變，股價上上落落，吼住軟少少之時，低位買3864。
章盛