早排傳聞多多的中意控股（1198），在發表通告澄清無咩員工離職之後，昨日股價顯著反彈，升咗13.6%，收5.20元，但經紀黃就話，中意同以前唔同咗好多，早前已有唔少芬佬沽咗貨，暫時未見有新芬進場，所以都係睇定多少，唔好喺家陣博反彈。
中意昨日成交股數186萬股，金額946萬元。
經紀黃話，中意自從有位創辦人兼董事於數月前悉數沽貨去咗炒樓，董事會成員開始有多少唔同，然後最近又打開口牌話想買起隻兩儀控股（094），加上近期泰興（389）爆煲事件，芬佬對中小型股已成驚弓之鳥，導致中意由7元沽落至最近的4.30元。
經紀黃話，響情況未明朗，同埋芬佬對中小型股信心未返嚟之際，家陣走去博反彈並唔明智。
另外，早前炒業績，股價已見異動嘅漢登控股（448），昨日終於公布靚仔業績，盈利有1638萬美元，比舊年上升46%，隻股PE已唔高，今次業績公布後就更平。
漢登昨日收1.30元，無起跌。
慕容小初