「當時我見到個阿叔用布塊幫個差人㩒住傷口，而受傷差人就有少少咳，我以所學到的急救知識判斷，係阿叔㩒住傷口嘅力度太大，於是叫阿叔放鬆點，同時又不停叫個差人唔好瞓！」前日在長沙灣保安道即場為受傷警員按住傷口的兩名好市民之一的蕭景生表示，雖然當時因救人而遲上班遭上司微言幾句，但他認為是值的，日後遇到同樣事情「仍會救急扶危」。
「不停叫佢唔好瞓」
在紅十字會服務十年、三年前開始加入醫療輔助隊的蕭景生（二十三歲），在保安道附近一金融機構工作，他每天清早由深水埗富昌邨寓所步行二十分鐘返工；前日早上，他上班途經案發現場時，見到一名阿叔正在用布塊幫受傷的警員按住傷口，第一個反應是十分驚訝：「差人怎會受重傷呢？」但很快冷靜下來。
蕭景生說：「我見到個差人幾乎全身都係血，我接過阿叔塊布幫個差人㩒住傷口，我不停叫佢千祈唔好瞓，要堅持呀，白車就到啦！」他幫受傷警員按住傷口約七、八分鐘，並一直鼓勵他要保持清醒，直至救護車到場才離去，此時蕭才發現自己的手亦染滿鮮血，但他並未擔心因此而會感染甚麼病，因為他清楚知道自己手上沒有傷口。
「我一直留意新聞，希望佢可以大步檻過啦！」蕭景生補充說：「事後先知個差人受傷都追咗五十米，我覺得佢好英勇，係一個盡忠職守嘅差人，我希望佢快啲康復，繼續為市民服務！」
本報記者