賭王何鴻燊除咗有錢之外，重有四個老婆咁多，相信香港唔少男人都好羨慕，但原來燊哥後生時嘅戰績更加彪炳，重試過一敵三十六，真係豔福無邊！燊哥噚日自爆話，最多試個有三十六個女仔，一齊撲埋嚟攬住佢唔肯放，認真厲害。
燊哥噚日捐咗一塊超過百年歷史嘅古董雲石屏風，畀將會成為孫中山博物館嘅甘棠第，呢個地方第一任屋主何甘棠就係燊哥嘅叔爺，燊哥喺個捐贈儀式度自爆咗唔少豔遇趣聞。燊哥話，日本仔打香港時，甘棠第就係抗日嘅大本營，當時佢就做咗十五日空襲警報員，但班警報員之中仔就得兩件，女嘅就有成三十六個咁多，啲女仔每次聽到炮彈聲就好驚，跟住全部撲過嚟，死攬住佢哋兩個唔放，但佢誓神劈願話，絕對冇乘人之危抽水！
「可惜冇乜邊個靚！」
呢單嘢都過咗幾十年，燊哥重咁念念不忘，睇嚟嗰啲女仔真係攬得燊哥好實，但令燊哥遺憾嘅係，原來三十幾個女仔之中，燊哥冇一個睇上眼，佢忍唔住要話：「真係可惜，冇乜邊個靚！」
如果要講晒甘棠第嘅笑話，燊哥話要講兩個幾鐘都講唔晒，但佢都醒多個笑話，畀啲參加捐贈儀式嘅嘉賓。燊哥話，佢五叔何甘棠有十四個仔，其中一個叫世威、一個叫世猛，有一日呢兩隻馬騮考完試返嚟，威仔話佢考第三，猛仔話佢考第四，佢五叔就好開心，即刻喺個袋度掏咗幾塊金仔，諗住送畀佢兩個。
點知五叔老婆好醒目，識問佢兩個：「你嗰班有幾多人？」咁先發現，原來佢兩個嗰班得四個人，重要係最差成績嗰班，即係一個包艇、一個尾二！不過世威大個咗冇失禮，做咗港英嘅華民政務司。
唔少何甘棠嘅後人都有參加呢次捐贈儀式，佢嘅孫何鴻圖、何智聰同埋佢嘅外曾孫謝天賜就好努力，希望可以搵番晒甘棠第當年散失嘅家具擺設，將甘棠第還原。佢三個同八方講，幾廿年前賣甘棠第時，啲家當就畀家裏面嘅人分豬肉咁分晒，燊哥當時就買咗呢個屏風，但要湊番啲家當都好難，因為唔多後人好似燊哥咁捐番出嚟，好似客廳原本有四盞大燈，但淨係籌番兩盞，因為有兩家後人唔想攞番出嚟，要數嘅話，重有兩張地毯喺加拿大。
肥平就頒咗張感謝狀畀燊哥，重話希望佢善舉可以啟發港人，積極響應籌建