論PS2上人氣之Action遊戲，《真．三國無雙》絕對能佔一席位，故事以中國戰國時代做背景，熟讀中國歷史嘅朋友自然玩得津津有味，不過日本人都唔會虧待自己人，最近就推出咗《戰國BASARA》呢隻以日本戰國時代做背景嘅動作遊戲，鍾意玩《真．三國無雙》嘅朋友不容錯過。
記者：梁瑋瑜
唔講唔知，原來遊戲個名裏面嘅「BASARA」，係指由鎌倉時代末期開始，喺戰場上舞動華麗身影嘅武將，漢字可以寫成「婆沙羅」，當中係有尊敬嘅含意！套入真實的遊戲內，水墨畫式人物設計造型，再加華麗暴風的遊戲戰鬥場面，相對玩了多年的《真．三國無雙》系列，畫面絕對有過之而無不及，「婆沙羅」一詞真係絕非過譽！
日本戰國時代真實人物
《戰國BASARA》嘅故事背景係十六世紀、戰國時代嘅日本，遊戲裏面嘅16個主角，好似武田信玄、織田信長、真田幸村、上杉謙信等等全部都真有其人，所採用嘅亦都係真實日本版圖，對於日本歷史有研究嘅玩家，當然會玩得特別投入；不過即使你冇乜點聽過呢啲史實，《戰國BASARA》喺人物設計方面都非常吸引，因為遊戲嘅製作人係《DevilMayCry》同《Biohazard4》嘅小林裕幸，而人物設計就係由《DevilMayCry》嘅土林誠負責，聽到呢個強勁嘅陣容，大家都知道《戰國BASARA》幾咁來勢洶洶啦！
逐步統一天下
遊戲雖然係根據真實嘅人物同版圖而設計，不過日本嘅命運如何，就由玩家一手決定喇！開始嘅時候玩家可以選擇以統一天下為目標嘅「天下統一」模式，喺幾個主角裏面揀一個嚟玩，隨着佔領嘅地方愈多，可以使用嘅人物亦相應愈多，每一次成功征服到一個區域，就會得到一啲武器同埋軍備，征服得愈多地方，實力就會愈強勁，愈接近統一天下嘅目標。
除咗「天下統一」模式之外，玩家亦可以選擇自由配搭主角嘅「自由合戰」模式，喺呢個模式裏面，玩家可以揀番喺「天下統一」模式出現過嘅武將同埋打通咗嘅戰場，想點打完全由你編配。
手起刀落快感十足
話明係動作遊戲，玩家要做嘅嘢就係喺戰場上面殺戮敵人，記者試玩嘅時候，覺得人物動作十分之明快，手起刀落非常有快感，而遊戲設計者都好有心思地，為每個角色設計咗專用武器，好似武田信玄有軍配斧、上杉謙信有長刀咁，另外係每一位武將都有一種獨特嘅「BASARA技」，透過殺敵或者取得寶物，令到BASARA能量棒充滿，就可以使用「BASARA技」，一次可以打死百幾人，唔單止加速統一過程，重加倍有快感。
售價：$408
CAPCOM(23661001)