恒指埋單升0.74點，以點數計仍然係升市。藍籌股表現非常參差，中移動（941）扯高恒指44點，而滙控（005）則拉低恒指32點。芬佬推高㩒低重磅股，手法好難估計。總之，恒指現水平唔低，輕注短炒無妨，大注留意風險。
長實C輪3935：繼滙控之後，長實（001）係第2大拖低恒指藍籌，收82.30元，足足跌夠1元，拖低恒指7點。
長實近期累升唔小，高價追C輪唔化算。長實回軟之時，則又有承接力，買入C輪可以諗吓，實行餐搵餐食餐餐清，上車後到有利潤，即行落車，然後吼低又買過。同1隻輪，1日轉身幾次冇所謂，反正炒輪成本低，1個價位變化已經有利潤夠買菠蘿包。
長實C輪炒上炒落對象，係3935，10月中到期，輪價99仙，溢價0.7%，槓桿率8.3倍（有效7.5倍），引伸波幅19.7%。
中銀C輪4760：中銀（2388）有回吐，收15.10元，唔見15仙。如果再跌，趁低買啲C輪，對象係4760，10月尾夠鐘，輪價62仙，溢價3.4%，槓桿率24.4倍（有效12.2倍），引伸波幅21.2%。隻輪溢價唔算低，喺55仙左右上車，有錢賺嘅話，亦要做快閃黨，賺咗落袋嘅利潤先至係真正嘅利潤。
章盛