中央政策組前成員練乙錚不嬲都好關心社會，原來後生時已投身社會運動嘅教協會長張文光，就係練乙錚高足。
張文光話讀中學時，好少關心社會，點知有次九龍灣木屋區失火，好多居民無家可歸。當時練乙錚就捉住班同學仔，包括張文光在內去到災區，反覆問學生「你哋可以為佢哋做啲乜？」咁啱得咁橋，當時都係做教師嘅程翔都帶學生去視察災後情況，真係惺惺相惜。
張文光探完居民，翌日返校即刻寫大字報，呼籲同學捐啲衫褲鞋襪出嚟，結果真係有人響應。經此一役，令張文光立志走上從政之路。
張文光又話，呢個假期搞掂咗啲超額教師，所以決定同老婆去墨西哥同古巴玩吓，個女就去斯里蘭卡做義工，女大女世界，唔管得咁多。
爆料熱線：29290000、27860099
報料傳真：26239278
報料電郵：[email protected]