大市連升數日後，終於識得唞一唞，不過，繼大藍籌地產股後，二三線地產繼續發力，雖然經紀陳噚日品題嘅華人置業（127）亦升1.32%，收7.70元，但點都唔夠隻大昌（088）單日升8.67%，收4.70元咁勁。
噚日大市雖然未至於搞到禾雀亂飛，但陸續有細隻地產股被發掘，如細摩就叫買盈大地產（432），另外物業代理美聯集團（1200）亦受推介。
既然樓價升，而租金亦向上調，咁租金佔好大成本的零售股又點睇呢？經紀黃就話好睇個別情況，其中剛於上月中公布全年業績的Joyce(647)，就因為阿媽係大地主的關係，理論上可佔有一定優勢，而自從公布業績後，唔少證券分析員都探訪過Joyce，反映投資者對呢隻股有一定的興趣。
Joyce剛公布截至今年3月止業績，盈利615.9萬元，比舊年上升101.7%，據分析員收到嘅資料，Joyce的零售樓面明年將會增長兩成，另外，由於歐元近期下跌，佢哋又冇調整貨品售價，所以將會因此受惠咁講。
慕容小初