九倉電訊噚日搵咗英皇歌星Kenny關智斌，喺尖沙嘴朗廷酒店搞咗個推廣新產品記招，蘭西都有湊熱鬧。
九倉電訊市務總裁張東林Tony話，長期減價吸引客戶唔係辦法，所以推出iVoiceMail網留言服務，拓展市場。賣點係每次有留言，客戶會即時收到電話同電郵雙重提示，除咗可以用電話聽之外，又可以喺任何地方用電郵播放留言。
點解搵Kenny，Tony話因為Kenny都係IT人（唔係講件衫），而Kenny就話，𠵱家本地樂壇同電訊業一樣競爭劇烈，所以一拍即合。主辦單位重喺現場播放Kenny嘅新歌MV──「先知」，主題係話如果有咗iVoiceMail，各位嘅「愛的留言」就實冇遺漏嘞。