香港少年制服團體主辦嘅「同心同根萬里行」內地考察團，噚日喺香港歷史博物館舉行授旗禮，煲呔同中聯辦副主任李剛應邀主持授旗儀式，其間又對團員勉勵一番，令到啲團員都不知幾興奮。
香港女童軍總會香港總監李張慧美出席活動時講到，董太趙洪娉對女童軍貢獻良多，所以已經發信邀請董太擔任名譽會長。至於會長職銜，順理成章由煲呔太座曾鮑笑薇接棒。曾太個副會長職銜方面，又係好自然咁由政務司司長許仕仁太太羅美美接任。唔知同肥龍一樣酷愛跑馬仔嘅許太，會唔會好似董太同曾太咁，全身投入女童軍嘅工作呢？
煲呔上位，佢位前上司兼萬里行活動召集人鍾逸傑當然好高興。佢同八方講，自己剛從西安回港，嗰度有成攝氏37度，但係都冇香港咁熱。鍾逸傑對煲呔信心爆棚，話佢嘅施政會更有透明度，連煲呔撐新世界將停車場轉做汽車展銷場佢都話支持，總之煲呔乜都掂啦！
爆料熱線：29290000、27860099
報料傳真：26239278
報料電郵：[email protected]