港股噚日雖然上升，但恒指進帳唔夠1點，而日中亦曾經跌過70多點，基本上已可視之為連升4日的調整市，只不過市底實在太強，跌唔落，整固完成後，好有機會向14800的初步目標推進。
兩大藍籌地產股長實（001）同新地（016）唞氣，大市由升0.70元嘅中移動（941）頂住；滙控（005）重未郁，相信好快會接力。二三線地產股果然發威，玩個別，後市重有排升。國企呢輪氣氛麻麻，但噚日已見轉勢，好似國壽（2628）同南航（1055）就分別進帳3.7%同7.8%，東航（670）亦升4.8%。國企升浪再現，金屬股沉咗咁耐，相信好快會輪到。
中國鋁業（2600）係金屬股中最強勢一隻，短線重係要昅實。約10日前，推介過中鋁，寥寥幾行字，大意係有幾個「芬」收集咗好耐，下一個升浪，要留意。當日中鋁股價4.15元，噚日收4.325元。早幾日，中鋁股價曾上過4.475元。
鋁價下半年料回升
中鋁有大行收集，股價強勢，主要係內地氧化鋁市場仍然供不應求，而鋁價經上半年的調整後，下半年普遍預期會回升。現時內地每噸氧化鋁出廠價約4330元人民幣，而進口氧化鋁價則為每噸4750元人民幣。由於市場需求殷切，中國有5成的氧化鋁需要進口，而內地氧化鋁的庫存量亦急降，由正常的30日回落到只有15日。
高盛看好中鋁，指鋁價上升有助支持氧化鋁價格高企，對中鋁維持正面看法，投資評級「優於大市」，目標價6元。大華繼顯報告指中鋁擴產計劃按進度進行，但能源價格上升令利潤率受壓，維持「買入」評級，目標價則調低到5元。
中鋁04年度（12月年結）氧化鋁產量682萬噸，升12.7%，電解鋁產量77萬噸，微升1.1%；05年度，氧化鋁同電解鋁的生產目標係750萬噸同101萬噸，分別上升10%同31%。鋁價後市向好，中鋁盈利升勢可保持，估計每股盈利0.6港元，升12.8%，以PE9倍計，6個月為期，上升目標係5.40元。
由4月中開始，中鋁走勢形成大型複式頭肩底，衝破頸線的後抽整固快將完成，升勢再起，第一個目標係5元。
郭兆誠