財政司司長唐英年周四下晝開始放假，據唐老太講，佢哋一家大小一如以往會去旅行，順便同個大孫仔搵學校升大學，去英國抑或美國重未最後決定。
臨放假之前，唐唐做咗一件「好事」，就係通知咗立法會，明年嘅財政預算案提早喺二月二十二日發表，以免三月底嘅長假期，影響工作進度，同時亦方便部份上北京開人大政協會議嘅議員，等佢哋可以參與。
八方早前見到港區人大代表團長袁武同埋成員譚惠珠，佢兩個都話冇向財爺提出要求，不過珠姐就話，肯定班戴兩頂帽嘅議員唔使兩頭騰咁辛苦。
另外，一班財金系統問責高官，包括唐唐、馬仔同孫公等，噚日喺金鐘某富豪飯堂酒樓宴請民主黨，佢哋只談風月、不談政事，但講到領匯官司時大家就眉飛色舞，孫公好有信心今日會有好消息，重同馬丁打賭，話如果盧婆婆贏，自己會同馬仔再請食飯；相反政府贏呢，就係馬丁請喇。
爆料熱線：29290000、27860099
報料傳真：26239278
報料電郵：[email protected]