廣告大獎頒獎禮酒會上，碰到賓架Ｌ，執得鬼咁正，非常之醒神，形象十分威猛，照計佢唔係日日返工都咁着意外觀嘅噃，梗有其他原因。個幾鐘頭之後，我哋食完甜品，頒獎禮開始，哦，原來賓架Ｌ間銀行得到一個銀獎，賓架Ｌ貴為零售業務阿頭，親自上台攞獎，據大會資料介紹，佢哋嘅廣告出街之後，銀行嘅保險產品銷售額，直線上升，唔怪得可以攞獎。
與賓架Ｌ閒談銀行家之西裝顏色，賓架Ｌ話：「都冇乜好揀咯，我哋嘅不成文規矩係深色，我成個衣櫃，都冇一件淺色嘅。」左丁山記起初入外資銀行之時，得閒就翻閱銀行嘅「標準操作手冊」，以免被內部稽核員抄牌，內有一條講明，僱員宜穿深色西裝，忌穿白襪。啱啱有一日自己着咗白襪黑皮鞋，蹺起交叉腳時，俾分行嘅營運經理（OperationsManager）睇到，立即俾佢教訓一頓：「重讀緊中學扮學生哥呀！」
諗起都好笑，於是問賓架Ｌ：「你哋銀行男職員可唔可以着白襪？」賓架Ｌ諗咗一諗，話：「好似冇規定，但應該唔值得鼓勵吖，返銀行工，應該穿深色襪嘅。不過咁，我哋指示啲男職員，坐在椅上、雙腿交叉之時，褲管向上抽起，小腿肌肉不應外露。」左丁山大笑，想起過往上大陸見高官，冬天寒冷時分，佢哋一蹺起腳，就見到內有長睡褲，甚為不雅。賓架Ｌ間銀行居然細心到指示男職員用較長襪筒遮住小腿肌肉，真係對禮儀關顧到無微不至。
於是問賓架Ｌ：「男士對襪洗過幾次，就會彈力鬆弛，襪筒自動向下移，你咪成日要買新襪？」賓架Ｌ答：「非也，澳洲製造嘅一個牌子，電腦設計，香港冇得賣嘅，我每次去澳洲旅行就買番一兩打，呢隻襪有好獨特嘅特色，唔會向下移嘅！」左丁山後來向一位澳洲通打探到牌子名稱，叫馬主Ｎ每次去雪梨就買一打返嚟。