美國樂壇大姐大麥當娜（Madonna）近年修心養性，放咗唔少時間照顧囡囡瑪莉亞（MariaLourdes）同囝囝羅科（Rocco），同導演老公基里奇（GuyRichie）嘅感情亦十分好。最近娜姐全家總動員喺英國郊區嘅大宅為雜誌《Vogue》拍攝一輯靚相，大晒一家敍天倫嘅幸福時光。
仔女扮鬼扮馬
現年四十六歲嘅娜姐日前為八月號嘅《Vogue》影咗輯靚相，全部喺佢同老公、仔女居住嘅英國郊區豪宅取景。娜姐想憑相片表達自己全心做個好媽媽同好太太，所以已經唔再好似以前咁打扮得咁大膽放蕩。其中佢喺屋外草地餵雞時，就着上一條好端莊嘅薄紗裙同米色羊毛外套，溫文嫻淑，但千祈唔好睇小娜姐身上嘅服裝，因為係出自時裝設計大師AlexanderMcQueen嘅手筆㗎。
轉頭娜姐又同八歲嘅瑪莉亞同四歲嘅羅科合照，佢對仔女重大玩cosplay，分別扮成古代武士同蝴蝶仙子，而娜姐就換上Marni黃色羊毛外衣同JohnGalliano嘅波波真絲長裙，洋溢一份家庭溫馨。娜姐當然不忘同老公基里奇大晒恩愛，坐喺馬上好煙韌咁搭住老公膊頭，好似過住平淡幸福生活嘅牧場老夫老妻咁。
拍自傳紀錄片
此外，娜姐將會演出一個喺年尾播放嘅全新紀錄片《I'mGoingtoTellYouaSecret》，片中會講娜姐點樣由舞蹈員成為巨星，重會以佢拜訪以色列作結，當中亦收錄佢早前嘅巡迴個唱片段。
圖片：美聯社
