第一時間衝入戲院看《神奇4俠》完全因為女主角謝茜嘉艾芭。打從看過《Honey》後便喜歡了艾芭，如蜜糖的膚色、標致的五官及小巧的身形，演技重唔錯㖭，最重要的是艾芭跟我在求學時期的暗戀對象長得有幾分相似，於是順理成章艾芭成為我的銀幕新寵兒。
又一齣超級英雄打怪獸的官能刺激電影，不過這次超級英雄一分為四，各有奇技，但奇得嚟有點熟口熟面，因為在《TheIncredibles》中已見過晒咁滯，橡皮人、隱形人加防護盾、大力神君及走到飛咁快，分別只係《神奇4俠》係真人版兼其中一個識着火啫。天真的同行友人說：「咦？乜係抄《TheIncredibles》嘅？」冇理由啩，《FantasticFour》這漫畫故事已有幾十年歷史，點抄《TheIncredibles》呀？
美國首周票房報捷，相信《神奇4俠》有排拍落去。這一集中用了半齣戲的篇幅去講述4俠如何受了宇宙氣流衝擊而改變了DNA，繼而發現及學習發揮超能。4俠當中最搶鏡的是「石頭人」，他是一個悲劇英雄，但喜歡搞吓對白gag，所以引發最多笑聲，跟《TheIncredibles》中的大力爸爸搞出最多笑料情形大致相同，就如「火人」在戲中的一句對白：「每個隊伍都需要一個吉祥物，『石頭人』便是神奇4俠的吉祥物。」
近來入戲院睇荷李活片，看咗一半係改編自Marvel的超級英雄片，版權收入一定係天文數字，唔知香港的漫畫教父黃玉郎先生有沒有看得牙癢癢，聽聞《龍虎門》電影的前期籌備已在進行，係時候度定個靚靚商標，將來大大個出現在銀幕上。