美股隔晚有調整，斷估港股點都會跟，豈料恒指係咁意低開多少，跟住就上上落落，埋單計數平收14567，始終唔肯跌。不過，期指小時圖已現頂背馳，較似樣的調整相信就在前頭，想買恒指同藍籌C輪，等多陣比較安全。
人民幣升值復惹憧憬，是日恒指得以不跌，全靠內地電訊股支撐，中移動（941）突破30元，收30.40元，升2.4%，聯通（762）升逾3%，收6.6元。資金顯然趁一線地產股回氣之際，轉炒一轉中資股，午市國企指數轉跌為升，大大隻嘅中國人壽（2628）可以半晝掃高近4%；飛機股在波仔唱好下亦見起飛，最厲害係南航（1055），大升7.9%。
想跟炒國企，冇乜點郁嘅金屬股可優先留意，鞍鋼（347）同中鋁（2600）都係對象，但只宜短炒，講到尾，國企股上半年業績普遍唔會太靚仔，順勢跟炒無妨，揸就要諗過。
倉內的佐丹奴（709）觸及止賺位，已按計劃沽出。國泰（293）再進兩格，計數位調高至14.40元。早段追入莊士機構（367），股價以大陽燭升破保歷加通道頂，估計略為整固後可上試0.76-0.80元阻力區，中線目標仍看0.85元，跌穿0.70元止蝕。
量度目標0.83元
中資股開始有氣氛，二三線股亦然，而且不只限於小型地產股，睇嚟好快就會百花齊放。
看圖尋寶，見到高寶綠色（274）走勢甚佳，由6月中至今，日線圖上營造了一個小圓底，頸線在0.76元，股價昨日微退1格，收0.75元，看來正在造「柄」，技術指標方面，MACD剛現牛差距，隨機指數的%K在底部升越%D後，開始拋離，均屬利好，股價如能升破頸線，小圓底量度升幅目標最小可達0.83元。
趙飛雲