大市連升4日，恒指收14567，升62點，成交176億元。升破大型徘徊區阻力後，急衝一段，有機會升到14800先會出現調整，特別係下禮拜期指部署結算，大戶會趁機做工夫。
地產股繼續帶動大市上升，幾隻大藍籌有大盤追入，長實（001）升0.85元、恒地（012）升1元、新地（016）升1.60元。最勁係兩隻重列成份股嘅信置（083）同新世界（017），前者大升7.3%，後者亦有6.1%進帳。大股帶動細股，地產股上升層面已開始擴散，二線股的華人置業（127）升3.4%，三線股的泛海國際（129）同滙漢控股（214）就升咗4.1%。
大行睇樓市前景，呢輪大唱對台戲，正當大摩同摩根大通熊市論言猶在耳，高盛證券最新研究報告就大派定心丸，預期未來18個月，本港住宅樓價可上升30%，並令整體樓價回復到1997年第3季樓價高峯期的70%。
高盛話息口上升對樓市影響逐步減退，轉工率及家庭收入上升，增加買家入市信心。高盛指有關樓價預測會令大型地產股每股資產淨值在1年內可上升5%至33%，其中嘉里建設（683）及信置為首選。嘉里收19.40元，升0.50元，過去6個交易日，已累積上升12.8%。
主席增持有啟示
噚日推介中航技術（232），最高搶上11.3仙，收10.8仙，升10%，成交更大增到1.6億股。「細細粒」股票中，短期有一隻亦可留意，就係生命科技（1180），噚日收7.3仙，升5.8%。
生命科技今年初曾升上18仙水平，家吓得番個零頭，7仙幾呢啲位，亦係上市後8年嘅低價，只要業績有轉機，隨時會大幅反彈。公司主席連續幾日不斷在市場增持，數量雖不多，5日共1171萬股，總值約80萬元，但應該有啟示。
生命科技05年度（12月年結）上半年，銷售額有增長，主要產品「威佳」毛利率達80%，全年好大機會轉虧為盈，以公司市值不足2億元，若年賺2000萬元，PE亦只10倍，以生科企業計，呢個PE確實好吸引，近日便聽聞有基金想上車，但公司對前景好有信心，相信股價唔見雙位數，唔會割愛。
郭兆誠