英國靚仔男星祖迪羅（JudeLaw），早兩日俾仔女嘅前保母黛絲韋特（DaisyWright）爆料，指佢今年三月喺美國拍攝電影《AllTheKing'sMen》嘅時候，引誘佢發生性關係，事後俾祖迪嘅仔女撞破，祖迪前妻莎迪霍絲（SadieFrost）知道後即時炒咗黛絲。噚日祖迪向英國傳媒發表聲明，向佢同居未婚妻施安娜美娜（SiennaMiller）同家人道歉。
風流韻事多
其實祖迪一向風流，早前先有傳佢玩換妻，今次斷正惟有出嚟認錯，佢發聲明話對唔住施安娜同家人，佢話：「對於報章嘅報道，我感到好羞愧同失落，我傷害咗施安娜以及同我最親近嘅人，我想向施安娜同我家人公開道歉，我為佢哋帶嚟痛苦。我唔會為我嘅行為辯護，我真係好後悔，不過喺呢個艱難時刻，我希望大家尊重我哋嘅私隱。」
有英國報章亦報道，祖迪同施安娜為呢件事嗌大交，重已經分咗手。報道話施安娜搬返去同阿媽住，佢同朋友講今次好似俾人出賣咁，𠵱家好憎祖迪，重覺得佢係一個恥辱。
食過翻尋味
此外，黛絲又透露上星期四祖迪先打過電話畀佢，懇求黛絲延續呢段關係，但黛絲已經唔再聽佢點，佢話：「𠵱家我知道佢當時只係為咗滿足性慾，佢打畀我話想再見我，我真係好震驚。我同佢講好唔公平，我連份工都冇埋，佢話好想證明我哋嘅關係唔係性咁簡單，不過之前佢咁輕易掉我埋一邊，我重點信佢呀。」