亞視有人事變動已經係家常便飯，身為首席級製作總監顧問及製作總監（戲劇科）嘅元老級電視人梁立人，最近向亞視請辭，馮仁昭聽聞曾任職前亞視監製嘅楊紹鴻即將回巢，頂替梁立人，而佢入主之後會籌備開拍《任劍輝傳》嚟打響頭炮。
聽仙姐意見
據白雪仙啲朋友講，早排楊紹鴻就開拍《任》劇而搵過仙姐，聽佢嘅意見，楊紹鴻重提過心目中有幾個飾演任姐嘅人選，包括陳寶珠、龍劍笙同莫文蔚，但佢希望聽埋仙姐嘅意見後再作決定。
噚日馮仁昭同梁立人傾過電話，佢直認會喺下月離職，佢話同亞視係合之則來、不合則去，喺過去兩年，佢的確有做得唔好嘅地方。另一方面，梁立人亦都覺得喺亞視做嘢唔夠過癮，佢話亞視有成一千名員工，但係製作部就得嗰五十人，試問又點會做得好，而且大家喺誠信上亦有問題，不過都算係和平分手嘅。
離職有遺憾
梁立人又話佢本來好想等到有亞視人同佢講，會相信佢可以扭轉形勢，可惜等咗兩年都等唔到，令佢有啲遺憾，但佢亦都寄語接棒人，希望後者可以善用亞視藝員，等班藝員可以有工開有飯食喎！
