個市欲罷不能，由地產股帶動，恒指進帳62點。信置（083）、新世界（017）、恒地（012）、新地（016）同長實（001）等5隻地產股，總共拉高恒指30點。地產股近排升得勁，地產C輪累積升幅唔細，要買都係等回吐之時先至諗。揀落後藍籌嘅C輪，比較穩陣。
滙控C輪4875：恒指創01年3月以來新高，滙控（005）125.90元，仍然低過去年11月高位136.50元超過10元，有炒落後可能。昨日推介嘅滙控C輪4789，昨收0.74元，升2.7%，勝在壽命長、溢價低。如果認為爆炸力唔夠勁，想刺激啲，可以揀4875埋手。
4875年底夠鐘，輪價40仙，溢價2.5%，槓桿率31.5倍（有效17.1倍），引伸波幅11.1%。
如果重想更勁爆嘅，則揀0.20元以下嘅C輪，但要畀高好多溢價，而萬一正股唔郁，則呢啲輪會跌得幾傷吓。風險與回報兼顧，4875啱炒。
新地C輪4898：新地升1.60元，收80.45元。如果回番，例如見79元左右，低位買啲C輪，對象係4898。隻輪11月下旬到期，輪價51仙，溢價3.1%，槓桿率15.8倍（有效10.9倍），引伸波幅16.6%。
新地如續升，則放棄買C輪，但亦唔好揸P輪。
章盛