大市牛皮大半日，諗住恒指埋單會徇眾要求跌番多少，點知3點過後買盤殺到，掃起地產股，帶動恒指連升4日，再漲62點，等買貨者如趙飛雲之流，條頸又長咗半吋。
恒指是日雖升，但成交縮減至176億元，動力未見加大。趙飛雲等位買C輪，已經等咗幾日，唔怕再等落去，總之一日唔調整，一日都唔會高追C輪。玩輪不同買股票，高追買貴貨，遇啱調整，隨時會輸埋引伸波幅同時間值，入市時間一定要掌握得好。
倉內的佐丹奴（709）微退1格，收報5.65元，止賺位提高至5.60元。國泰（293）進帳1格，收報14.50元，墨西哥灣有颶風吹襲，須留意對油價的影響，油價若復躍升，航空股好難有運行，國泰如失守14.35元支持，宜先止蝕。國企指數守穩20日線，趙飛雲自然未有買入中企P輪3834，但仍會留意買入機會。
高盛發表報告，指寫字樓租金未來兩年尚有5成空間，而本港住宅樓價未來一年半會有30%上升空間。不過收租股昨日回氣，暫時無大反應，地產發展股就先行開車，新地（016）、恒地（012）兩大天王均升逾2%，二線地產股更誇張，新世界（017）大升逾6%，信置（083）一跳就7.3%，都係在收市前1個鐘內谷上去。
上望0.85元
大隻地產股先行，細隻地產股有機會跟住炒番轉，其中莊士機構（367）值得留意。莊士上周公布全年業績，純利2.3億元，增1.13倍，但主要來自投資物業重估盈餘。莊士的確持有不少投資物業，單是莊士倫敦廣場，面積便達11.3萬呎，近年舖位升值快，莊士資產值自然水漲船高，估計每股NAV2元以上，現價0.7元，折讓近7成，可輕注買入，上望0.85元。
趙飛雲