高盛地產股分析員易將，由丁竹筠換上胡一威，對本港樓市的看法亦由審慎轉為樂觀，預期樓價年半之內升30％，寫字樓租金亦會升50％，成為樓市大好友。噚日地產股即勁升和應，恒指地產分類指數升2％或382點至18880收市，雖然滙控（005）及中海油（883）受壓，但大市仍在地產股支持下再闖4年半高位，收報14567，升62點，不過成交縮至176億元，就比較難睇少少，令人懷疑短期會否出現調整。不過，黑客就認為，港股近日升勢是由於大戶有組織地輪流踢高藍籌股來將大市不斷托高，短期內都不會輕易放軟手腳，任由其大幅調整。
新世界（017）與信置（083）分別升6.1％至10.35元及7.3％至9.55元，太A（019）收市更創76.15元新高，升2％，新地（016）及長實（001）則升2％及1％。
中海發展阿媽識做
新怡環球（1094）近排由0.043元抽高至噚日的0.1元水平收市，升幅達1.32倍，噚日單日升66.6％，成交只得19.43萬元，而且有搭棚迹象，因為買盤不多，收市前只見0.085元得一個20萬股的買盤，市場同時有傳聞話新怡賣盤有着落，不過阿虎當然不為所動，最近市場對工業股充滿戒心，而新怡環球似乎想由鞋業轉型為科技股，新業務又未見有突破，而原有鞋業未見理想，點睇都唔明股何以能夠大幅反彈。
中海發展（1138）原本想話同母公司重組乾散貨輪業務，然後分拆上市，可惜市場對此唔睇好，而母公司亦好識做，將重組計劃押後，但只能刺激股價反彈0.9％至5.55元。
泛海酒店（292）今日將公布業績，噚日炒高10.7％至0.93元，早前傳過公司想配股，唔通係準備定一公布完業績就即時配股。
阿虎