地產股在長實（001）帶動下，無懼加息潮，發力勁升，其中信和置業（083）昨日勁升7.3％，收9.55元，而新世界發展（017）亦唔弱，急升6.1％，收10.35元，兩隻股都創下52周新高。
其他二三線地產股亦唔差，好似正在同信置一齊賣緊畢架山峰的華人置業（127），股價一樣節節上升，昨日又升3.4％，收7.60元，又係52周新高，成交股數257萬股，金額1929.8萬元。
經紀黃話，地產股好炒，芬佬自然追貨追到氣咳，至於華置方面，除咗持有大量貴重物業特別值錢外，重有個炒上誘因，就係年頭發行金額18億銀的可換股債券。
呢批債券行使價係7.37元，若果希望票據持有人行使的話，估計華置重要炒上，批債券持有人要有水位賺錢先至肯換股，所以股價雖然升幅唔細，但仍有一定留意價值。
除咗華置外，將於今日公布全年業績的泛海集團（129），股價亦預先炒上，昨日升4.1%，收0.375元。經紀陳話，唔使問阿貴，泛海業績應該可由虧轉盈，只差唔知賺幾多。
慕容小初