大市在長實（001）及和黃（0013）帶動下，話升就升，與此同時，多隻中資股就輪住嚟發出盈利警告，搞到多隻中資股上周股價跌到四腳朝天，好似跟大市走勢對着幹咁，認真係離奇。
同樣來自祖國，即將完成借殼嘅中化香港（297，臨時編號2992），股價就硬淨異常，間公司剛剛公布要按每股1.25至1.70元，配售不多於3.9億股，以維持公眾持股量，股價雖然一度急跌，但好快就升返轉頭。
經紀黃話人哋已經出發去世界各地搞路演，中化股價又頂得咁行，希望配售價可以在高位定價。
中化喺年頭公布以50億元注入大股東的化肥業務，其間雖然有小小波折，但在兩間外資行協助下，終於搞掂好大截，家陣隻股已經完成10合1併股，至於1供3的供股計劃亦唔應該有疑難，搞埋呢筆配售後，中化成個借殼大計就終於搞掂晒。祖國同胞消息就話，中化注完化肥業務後陸續仍有搞作咁講。
中化上周五收1.59元，升5.29％，成交股數589.3萬股，金額920萬元。
慕容小初