長實執行董事趙國雄一向形象百變，噚日喺紅磡都會商場嘅婚紗時裝表演，就以一身新郎打扮，同着住婚紗嘅模特兒，把臂行Catwalk，當然唔少得佢最鍾意嘅太陽眼鏡做配襯啦。佢重話，今次係佢咁大個人，第二次行「秀」，第一次就係九個月大嘅時候，當年佢參加BB爬行大賽，因為自己當時已經好高大，而比賽規則係計成個人過晒終點線先至算贏，所以輸咗隻腳趾尾，得第三，獎品係六罐奶粉。
今次形象總算特別，不過最近頻頻見記者嘅趙國雄，講到樓市就已經無乜新意，又係講番樓市唔會受加息影響，第四季息口重有機會回落……。
至於其他發展商有新盤推出，佢就話接力推盤可以帶動樓市氣氛，唔使截擊，重話要去佢哋個示範單位「踏台」，即係支持咁解。
電郵地址：[email protected]