香港電台停播賽馬節目搞出個大風波，工商及科技局局長鬍鬚仔曾俊華同常秘何宣威都因為人不在港而執身彩，黎陳紫娟頂晒，不過黎太喺立法會遭議員詰問，都算撐得住，個人仕途應該加咗分。
八方聽聞，曾局長上周四已經返港，遲吓會就港台事件再到立法會交代，鬍鬚曾覺得問題不在政府，因為係雙方同意嘅，不過，既然中間有反覆，亦要處理。
其實一提起港台，班官就好頭赤，視之為怪獸；有高官話：講福利時，佢哋係公務員，係政府一部份；但喺其他時候，佢哋就係新聞工作者，要獨立自主。所以今日仍有高層認為，與其拖拖拉拉，不如一了百了，解散咗佢算數，政府喉舌嘅角色，咪由政府新聞處（GIS）自己做番，必要時攞條頻道播吓嘢，好過俾人話箝制新聞自由。
用20億解散港台怕市民鬧
不過，有人又話政府一打個算盤，發現賠錢畀班大哥大姐走，要動用成二十億元！政府剛剛滅赤在望，又花咁大筆錢，市民分分鐘會大鬧，咁咪自討沒趣？講到尾，港台當年錯失公司化嘅良機，今日就難有彎轉。
八方記得張敏儀曾經話當年。原來喺八九民運之後，本來輪到港台公司化上議程，可惜大Sir鍾士元有影響力啲，要先做醫管局，港台問題按下不理。當然亦有人話，係因為港台當時大部份員工唔想放棄公僕嘅身份，所以郁唔到。𠵱家時移世易，到啲員工肯，政府又唔制，話暫時冇此計劃喎。
港台問題目前咁鬼政治化，八方睇唔到有乜轉機，鄭大班提出以港台廣播道三塊合共值八十億嘅名貴地皮換取公司化嘅構思聽落可行，但係鬍鬚仔已經話咗唔會當港台搬遷為地產項目，大班唔好再想創個心，除非佢老友煲呔點頭，否則港台九成原地踏步，等陰乾。
朱培慶佢哋前景雖然黯淡，但講句公道話，港台的確有唔少優質節目，亦有大批擁躉，呢個至係同政府拗數嘅真正本錢。
傳真︰2623-9278
電郵︰[email protected]