萬眾期待、由「長今」李英愛主演、朴贊郁執導嘅電影《親切的金子》，將會喺今個月二十九號喺韓國上映。為咗幫新片造勢，由愛姐擔任代言人嘅韓國化妝品牌太平洋「IOPE」，最近喺當地搞咗個「親切的金子化妝示範」活動，等愛姐fans學吓化番個潮爆「金子妝」，認真夠晒心思。
愛姐今次喺《親切的金子》嘅形象上面有好大突破，佢飾演出獄後一心要復仇嘅金子，為咗增加殺氣，愛姐重搽咗鮮紅色smokyeye示人，同佢喺《大長今》入面純過蒸餾水嘅形象差天共地。
贊助化妝品
而韓國化妝品牌太平洋「IOPE」為咗力撐愛姐，除咗贊助佢喺片中所用嘅化妝品之外，由噚日開始直至禮拜四，又會喺奉天洞、富川車站嘅分店前，舉行「親切的金子化妝示範」活動，免費為女士化番個潮爆「金子妝」。現場重放咗電影海報板，等愛姐fans化完靚靚妝之後，可以即時變身做金子影相留念㖭！