又到暑假，對好多學生嚟講放暑假就梗係開心啦，但對部份畢咗業又未搵到工的「雙失」年輕人嚟講，暑假簡直係噩夢的開始！佢哋冇工返又冇錢使，又唔想攤大手板問屋企人攞錢，一日到黑留在家中都唔係辦法。到底有咩辦法可以$0消費過一Day？即睇梁思浩親身示範！
記者：黃藹瑩
攝影：伍慶泉
特別鳴謝：梁思浩
11:00am起身：去FoodCourt睇電視
斷估暑假學生哥們都絕對唔會早起，一日行程就由中午開始。啱啱起身又未肚餓，最好就係睇吓電視，了解一下世界時事。對時事有認識，分分鐘可以幫你見成份工。
天氣咁熱，要有電視睇又可以免費歎冷氣，首選一定係商場FoodCourt啦，地方夠大又夠寬敞，避開食飯時間座位簡直多到坐唔晒，就連瞓低都得！而且商場FoodCourt的電視有個好處，就係唔止得一部，每部都播緊唔同電視台嘅節目，新聞台、娛樂台、煲劇台、體育台等等，選擇重多過你屋企！
1:00pm開餐：超市魚翅啷口
睇完電視就係時候開餐喇！想免費填飽個肚唔係唔得，不過一定要識揀地方！今次思浩就去咗位置都幾就腳嘅又一城TASTE，呢個超市其實唔算好大，但試食的Counter就多到十足一條Buffet街咁，思浩行完一個Round都話：「我真係有飽嘅感覺！」
千祈唔好以為係思浩的特殊身份先可以免費試食到咁盡，實情係超市的一眾食品Promoter都好鬼熱情同Nice，人人經過都俾佢哋叫停試食，魚翅、牛排、麵包、酸齋、生果、雪糕、紅酒、花茶……真係豐富過去食一餐碟頭飯！
其他試食超市熱點：黃埔吉之島
2:00pm睇表演：溜冰場撞明星
一個Round食飽飽就不如行吓Hea吓喇！其實商場好多時都會喺呢啲時間推出特備的暑期表演節目，如果無的話，睇吓平民版真人表演都唔錯！推介你去溜冰場，涼浸浸有得睇人溜冰之餘，溜冰場外亦都企滿人，你一個人長時間企喺度都唔會覺得異相，周圍大把人陪你。思浩重話又一城溜冰場成日都會撞到張栢芝，如果你係Fan屎就更加要去喇！
其他溜冰場熱點：太古城
3:00pm打書釘
又係吸收一下文化知識的時間，PageOne呢類書店的最大好處係任打書釘，搵啱一本啱心水的書睇幾耐都得，坐低同人交換吓意見亦得。
4:00pm打機時間
呢個世代的年輕人對少陣電腦都唔得，手痕痕想上網打機，就最好去提供呢類免費服務的Cafe，PacificCoffee就係一個好例子！
5:00pm遊街睇窗
最後一程梗係來個WindowShopping。咪以為真係好無聊，其實吸收一下時裝資訊都唔會Out！
同場加映：師奶殺手嚟喇！
沿途梁思浩極受歡迎，師奶同細路都鍾意同佢一齊試食，有啲師奶重攞埋相機同佢影相，兼且跟足思浩全程，Hea足一日㖭！
唔使錢！齊齊試！
學生講：理想Hea點
