九九年人大釋法，唔單止破壞法治，重搞到唔少港人內地所生子女嘅居港權夢碎，造成唔少悲劇。好彩咁多年嚟，甘仔（甘浩望神父）都對呢班弱勢社群不離不捨。噚日一班爭居權者去中環政府總部集會，最近由內地徐州返嚟香港嘅甘仔都有嚟撑場。甘仔返徐州教英文都就快有兩年，最難得就係，有幾個當年爭居權失敗嘅港人內地子女，○三年開始就跟甘仔一齊北上做義工。
甘仔笑騎騎咁話，估唔到佢間居權大學，喺內地都有分校，幫到唔少有需要嘅人。其中一位追隨甘仔北上嘅義工黃恩笑，當年輸咗官司後激動到大喊「我哋唔係廢物」，令唔少人對佢都有印象。黃恩笑噚日都有去示威，佢話為咗應付教書，呢兩年不斷學好英文、國語，生活既充實又有意義，不過佢仍然唔會放棄爭取居港權。
傳真︰2623-9278
電郵︰[email protected]