肥龍許仕仁六月最後一日走馬上任當上政務司司長，先至發覺原來新問責制政府同以前好唔同，樣樣都唔靠得人，要自己親力親為，呢個包括睇文件、覆call、見人、開會同去做主禮嘉賓，總之冇一分鐘空檔，差啲連廁所都冇時間去。
肥龍要惡補，焗住唔敢外出，唐唐梗係唔理得你咁多，星期四同老婆仔女放暑假去也，煲呔就靜極思動，呢個星期日會率領二十高官去成都，出席周一揭幕嘅第二屆泛珠三角（即9+2）論壇，呢個論壇幫煲呔打咗好多國內關係，佢一定要去多謝大家，喺阿爺面前講咗好多好話。
煲呔要博做多十年，冇法啦，肥龍捱義氣頂住三日，試吓做署理特首囉，都幾光榮㗎。煲呔不在港，班高官可以唞唞，因為佢一返嚟，就會再捉住大家開大大小小各種類型嘅集思會，由早到晚腦震盪，真係人都癲。
傳真︰2623-9278
電郵︰[email protected]