上周全球股市走勢凌厲，美股杜指上升191點，升幅1.8%。港股更巴閉，恒指急升540點，升幅3.9%。港股升幅過大，估計暫時見頂，就算有心人做嘢，都要先唞一唞，消化之後再嚟過。高追C輪，風險唔細，要做嘢，先等一等。
滙控C輪4789：滙控（005）一周升幅3元，滙控C輪意氣風發，高槓桿率C輪升到七彩。滙控C輪4789屬遠期貨色，槓桿率相對較細，升幅相對於其他近期輪細好多。對於唔鍾意大刺激（贏輸都少啲）、有耐性嘅投資者，隻輪有得諗。
4789明年4月到期，輪價72仙，溢價1%，槓桿率17.5倍（有效11.9倍），引伸波幅11%。隻輪勝在壽命長、溢價低，溢價唔怕點樣收縮。吼正股回落些少，收集4789。
恒地C輪4953：恒地（012）呢幾日氣勢勁，但將走勢圖拉遠少少睇，則仍落後於其他一線地產股。吼低位搵恒地C輪買。
恒地C輪冇幾多隻好揀，4593比較睇得上眼，明年1月中夠鐘，輪價24.2仙，溢價3.15%，槓桿率15.7倍（有效10.1倍），引伸波幅16.4%，單日成交金額有300萬，已經係最熱門嗰隻。
章盛