行街鄭自廣州返港，走上左丁山寫字樓打招呼，問佢生意如何，佢話：「你睇我好，我睇你好啦。我落到嚟先至知道，一班老友喺六月份同時被炒。現在冇人理你有幾多經驗，幾多年資嘅，炒完你，咪搵番個二十五歲做你個位囉。」
語帶牢騷，雖然炒魷唔關佢事，但有兔死狐悲之懼。佢呢班被炒老友，在煙草公司工作好耐，時逢噩運，政府禁煙，雷厲風行，任你係乜嘢橋王，一時之間，都會暫時束手無策，苦思無計。冇新橋呀，美國老闆話，唔該借歪，等啲新人上場，新人事，新作風，試吓新方法都好，而且新人「二十五歲」，人工肯定平好多，既然新生意不來，慳吓皮費都好吖。
所謂二十五歲，並非一定唔得。行街鄭睇七月十五號嘅《Media》，內有一篇短訪問，對象係一位JopaMalantic，係新加坡Procter&Gamble（寶潔）嘅CountryMarketingManager；P&G係跨國大公司，以市場推廣出名，甚至可能係全美國最叻嘅FMCG（fastmovingconsumergoods）推銷公司。做marketing嘅人，假如喺西北大學攞MBA，入P&G工作幾年，喺美國就係少林寺正宗出身；入到呢類公司，由trainee做起，點都要十年八年先至做到CountryMarketingManager呢個高位。哈，神奇在呢位Malantic先生今年只得二十五歲，睇佢張相片，成個大學碩士生咁款，唔通佢係神童？算佢二十二歲大學畢業入P&G，三年內就升上高職？
左丁山對行街鄭講：「或者新加坡係細地方，銜頭膨脹之嘛。」行街鄭講：「無謂深究咯，我只係想講，啲二十五歲新人對我哋一班marketing老鬼好有壓力，無論佢哋得唔得，起碼有朝氣，薪水低過我好多，老闆就係鍾意呢一樣。自古美人如名將，不許人間見白頭，壓力好大呀！」