噚日係林志玲喺大連墮馬入院第十日，佢嘅傷勢明顯好轉，可以落床走動，𠵱家可以食肉同蔬菜，台灣東風電視台董事長葛福鴻同幾位同事噚日傍晚去探佢，有記者重見到有一位打扮同身形似足林志玲緋聞男友言承旭嘅男人閃咗入病房度，佢哋一行人傾到將近夜晚九點都未走。
林志玲嘅傷勢好轉，佢媽咪吳慈美神情亦輕鬆咗好多，林媽媽同記者講話林志玲最快禮拜四可以出院，而佢嘅主診醫生朱允濤都話林志玲恢復得好快。
林志玲嘅助手Gaby就話林志玲𠵱家朝朝九點幾做物理治療，有時佢會幫林志玲按摩對腳，林志玲多數會係睇DVD同聽音樂打發時間。
六仙女撐場
因為林志玲卧病在床，冇辦法出席噚日喺台灣舉行嘅《魔法嬌妻》（Bewitched）宣傳活動，林志玲嘅經理人公司搵咗洪曉蕾、陸明君、王聖芬、白歆惠、林葦茹同童怡禎等人化身六仙女代林志玲上陣，以六換一，可見林志玲份量有幾重。
