大宇與陳豪份屬兩代電視台師奶殺手，二人倒真的有緣，事關當年大宇離巢，陳豪做了接班人，到大宇回巢，外界比拼兩位新舊師奶殺手；後來二人合演《心花放》，陳豪演繹的角色搶盡大宇風頭；到現時無綫播映大宇的《開心賓館》，陳豪狽飛的《妙手仁心III》又被安排在晚上十時播映，陳豪處處壓着，不知大宇會否覺得對方是他剋星？
戲種難比較
大宇卻說：「兩部劇戲種唔同，你咁叻，掉轉做呀！你做《開心賓館》、我做《ER》(《妙III》呀！）」大宇報以連串笑聲後，又笑說：「講番個戲啦，上十點線（指《妙III》）嘥咗，有少少驚險鏡頭，因為大家覺得黃金時間唔係八點就係九點，公司可能都估唔到十點嘅《大長今》有好收視，所以行呢一步，係有啲兵行險着，但我都唔排除將來自己啲戲會喺十點出吖嘛，哈哈！」
欠時間洗腦
講開陳豪，曾與他合作拍劇的大宇便說：「佢𠵱家未算好，可以再好啲，但冇辦法，佢需要時間洗腦，佢都未停過，每日麻木咁做，就等如念台詞嘅機器，人攰出嚟嘅嘢會冇咁好，等佢休息叉吓電，威力會更加大，到時大家要小心啲呀。」
大宇看好陳豪非池中物，揚言與對方拍戲時也合作愉快，他說：「同佢拍戲好好，佢唔鍾意搞小圈子，幾勤力。」
但大宇又忽然鬼馬地取笑對方緋聞多，他笑說：「幾羨慕佢㗎，咁博愛，同佢拍檔嘅都好欣賞佢，有咁多靚花旦欣賞佢嘅態度之餘，又欣賞埋佢個人，我冇咁嘅條件啦，啲拍檔淨係欣賞我工作，唔欣賞我個人嘅。」